Үкімет өнеркәсіптік қауіпсіздікті қамтамасыз ету шараларын күшейтеді – Әлихан Смайылов

ҚР Парламенті Сенатында өткен брифинг барысында Премьер-Министр Әлихан Смайылов еліміздің кәсіпорындарында өнеркәсіптік қауіпсіздікті қамтамасыз ету туралы сұраққа жауап берді.

Әлихан Смайылов өнеркәсіптік нысандарда орын алып жатқан қайғылы оқиғалар мен төтенше жағдайларға Үкімет тиісті назар аударып отырғанын айтты.

«АрселорМиттал Теміртау» компаниясына қатысты айтатын болсақ, оның иелері тарапынан жасалған барлық іс-әрекеттерге немесе әрекетсіздігіне құқықтық баға беріледі», — деді ол.

Премьер-Министр Үкімет осы бағытта бірқатар қосымша шаралар қабылдайтынын атап өтті.

«Қазір осы саланы реттеуді жетілдіру бойынша заңнамаға қосымша нормалар дайындалып жатыр. Атап айтқанда, осындай өнеркәсіптік өндірістердің меншік иелері мен басшыларының жауапкершілігі арттырылады. Сондай-ақ мемлекет тарапынан бақылау шаралары күшейтіледі», — деді Әлихан Смайылов.

Оның айтуынша, мұндай компаниялардың жаңғырту мен техникалық қайта жарақтандыруды жылдық жиынтық табыстың кемінде 1%-ы деңгейінде қаржыландыру міндетін заңнамалық тұрғыдан бекіту ұсынылды.

«Бұдан басқа, жаңа технологияларды ескере отырып, өнеркәсіптік қауіпсіздікке қойылатын барлық талаптар қайта қаралады. Осы және басқа да қосымша нормалар пысықталып жатыр», — деді Премьер-Министр.

Мәселен, Әкімшілік құқық бұзушылық туралы кодекске, Қылмыстық және Кәсіпкерлік кодекстерге, сондай-ақ «Азаматтық қорғау туралы» Заңға өзгерістер мен толықтырулар енгізу жоспарлануда.

Әлихан Смайылов республикада заңнамаға сәйкес жыл сайын техникалық қайта жарақтандырудың жиынтық жоспары әзірленетінін айтты.

«Биыл 2,5 мың техникалық құрылғыны ауыстыру және 100-ден астам технологиялық желіні жаңарту көзделген. Бұл бағыттағы жұмыстар да күшейтіледі», — деп түйіндеді ол.

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу